دەنگ نێت

 

پارێزەرێک رایدەگەیەنێت ئەو ئامارەی لەبارەی جیابونەوەی هاوسەرەکانی گەرمیانەوە بڵاوکراوەتەوە هەڵەتێگەیشتنی تێدایە، دەشڵێت: رێژەی جیابونەوە بەوشێوەیە زۆر نییە کە لە ئامارەکەدا هاتوە.

 

کاوە لەتیف، بە رادیۆی دەنگی وت: ئەو داوایانەی لە ئامارەکەدا وەکو حاڵەتی جیابونەوە تۆمارکراون، تەنها تۆمارکراون نەک ئەوەی یەکلاکرابێتنەوە.

 

وتیشی: واتا ئەو داوایانەی کە رەدکراونەتەوە و بڕیاری جیابونەوەیان لێ نەدراوە یان ئەو داوایانەی کە ئاشتەواییان تیاداکراوە و پوچەڵکراونەتەوە، هەر بە جیابونەوە لە ئامارەکەدا ئەژمارکراون.

 

زیاتر رونیکردەوە: جاری واهەیە کەسێک داوای جیابونەوە تۆماردەکات، بەڵام دواتر دادگا داواکە رەد دەکاتەوە یان دواتر خودی هاوسەرەکان ئاشت دەبنەوە و دەگەنەڕێککەوتن، بۆیە ئەمە بە جیابونەوە حساب ناکرێت، کەچی لە ئامارەکەدا ئەمە وەکو کەیسی جیابونەوە تۆمارکراوە.

 

پێیشیوایە ئامارەکە بە وردی ئەنجام نەدراوە و گومانی هەیە هەڵەی گەورەی تێدابێت.

 

لەوبارەوە دەڵێت: بەهەمو پێوەرەکان ئەو رێژەی جیابونەوەیە زۆرزۆر و نالۆژییکییە، ئێمە کە لە دادگاین ئاگاداری ئەوەین کە راستە جیابونەوە هەیە، بەڵام بەوشێوەیە نییە و بەدڵنیاییەوە ئەگەر بە وردی ئامارەکە بکرێت ئەوا ژمارەکە بە نیوە کەم دەکات.

 

دوێنێ دادگای تێهەڵچونەوەی ناوچەی کەرکوک/ گەرمیان، ئاماری ژمارەی حاڵەتەکانی هاوسەرگیریی و جیابونەوەی لە سنوری گەرمیان و دەربەندیخان بۆ ساڵی ٢٠٢٣ راگەیاند، بەپێی ئامارەکە، لەو ساڵەدا (٢٦١٨) حاڵەتی هاوسەرگیریی "مارەکردن" و (١٣٥٢) حاڵەتی جیابونەوە "تەڵاق"ـی هاوسەران تۆمارکراوە.